今年要換機，無咁快過時的 5G 機一定係首選，不過市場上大部份 5G 機定價都由 $5000 起跳，對大部份人黎講都會覺得 Over Budget。今次做真心評測的小米 10 Lite 5G，售價相當大眾化，二千中就玩到。
小米 10 Lite 5G 硬件規格
屏幕尺寸：6.57 吋 AMOLED，解像度 2400 x 1080
機身體積：163.71 x 74.77 x 7.88 mm
重量：192g
處理器：Snapdragon 765G (八核處理器，最大速度：2.4GHz)
儲存空間：6GB RAM + 128GB 或 8GB + 256GB ROM
主相機：4800 萬像素 f/1.79 (標準鏡) + 800 萬像素 f/2.2 (超廣角鏡) + 200 萬像素 f/2.4 微距鏡頭 + 200 萬像素景深鏡頭
前置相機：1600 萬像素
電池容量：4160 mAh
防水：無
WiFi 6：無
無線充電：無
5G：有（未來）
其他：NFC、屏下指紋、20W 快速有線充電、支援單咭 5G 或雙咭雙待 4G + 4G
機身輕巧，設屏下指紋功能
二千機蚊嘅機，大家對小米 10 Lite 5G 的設計應該都唔會有好大期望，6.57 吋水滴屏幕，配合帶曲面的玻璃機背，設計比較大路，機身低於 200g，以大 Mon 機黎算是輕巧。不過用 AMOLED 屏幕，支援極速光感指紋解鎖功能，機身有齊紅外線同埋 3.5mm 耳機孔，可以將手機當係遙控使用之餘，亦方便用家連接有線耳機聽歌。
SIM 卡槽更加比旗艦機小米 10 與小米 10 Pro，支援單咭 5G 或雙咭雙待 (4G + 4G) 功能，官網指會在今後透過 OTA 軟件升級，實現雙咭雙待 (5G + 4G) 功能。
機面採用 6.57 吋水滴屏幕
前相機為 1600 萬像素
支援極速光感指紋解鎖功能
機身有齊紅外線同埋 3.5mm 耳機孔
USB-C 充電位置與雙咭槽在機底
現支援單咭 5G 或雙咭雙待 (4G + 4G) 功能
玻璃機背帶曲面
設四鏡主相機
操作系統就是齊全
小米手機的特點，就是無論你買最平或者係最貴嘅型號，MIUI 操作功能都是相當齊全，唔會偷工減料。無論將水滴屏幕顯示部份隱藏、護眼模式、深色模式、微光屏幕 (屏幕常亮)、手勢操作、遊戲加速、應用雙開及手機分身等，都完全難唔到小米 10 Lite 5G，可以正常使用。唯獨是啟動數個 Apps 後，在設定內操作會有明顯拖慢。
手勢操作 遙控功能 微光屏幕 (屏幕常亮) 遊戲加速 護眼模式 將水滴屏幕顯示部份隱藏 深色模式 應用雙開
效能比同價機高
小米 10 Lite 5G 最大的賣點，主要落在 Snapdragon 765G 處理器身上，還有 6GB + 128GB 及 8GB + 256GB 版本選擇。由於它並不支援 Micro SD 卡擴充，所以都是建議大家俾多 HK$500，直上 256GB 版本，起碼沒有容量不足的煩惱。
Snapdragon 765G 處理器與旗艦定位的 Snapdragon 865 處理器，同樣是 7nm 工藝，安兔兔跑分成績有 323014 分，效能比同價的手機如 Sony Xperia 10 II 都快唔少。下載 Fifa Mobile 試玩，流暢度與旗艦機無太大分別，不過係冷氣房玩左大約 20 分鐘，都有發熱問題。
安兔兔跑分成績有 323014 分
下載 Fifa Mobile 試玩，流暢度與旗艦機無太大分別
四鏡相機主要用雙鏡
有唔少手機牌子，為求使產品增加賣點，鍾意加多幾個實用性不高的拍攝鏡頭，令規格變得好看。對於拍攝方面唔算主打的小米 10 Lite 5G，4800 萬像四鏡主相機，常用的只有 4800 萬標準鏡以及 800 萬像素的超廣角鏡頭，主相機規格如下：
- 4800 萬像素 f/1.79 (標準鏡)
- 800 萬像素 f/2.2 (超廣角鏡)
- 200 萬像素 f/2.4 微距鏡頭
- 200 萬像素景深鏡頭
影 4800 萬像素相片清晰度 Downgrade
雖然拍攝唔係小米 10 Lite 5G 主打，但是用它支援像點 4 合 1 技術的 4800 萬像標準鏡，無論用其 X1 或者 X2 無損變焦拍攝，1200 萬像素相片表現在日光或低光的表現都相當唔錯。
在低光拍攝時，試過用自動模式或夜景模式比較，拍攝低光的磚牆更加明亮，而且牆身更為細緻，對比自動模式磚牆部份既黑又變成了油畫看不到細節，兩者的表現相距甚遠。
至於影 4800 萬像素相片效果又點呢？我們嘗試在天星碼頭用 ISO 50 影維港，放大到 100% 已經出現唔少雜訊，清晰度亦不高，大家都係影 1200 萬像素相片吧。
超廣角鏡銳利度高
800 萬像素的超廣角鏡頭，反而效果有點令人意外，相片的銳利度很高，看看在清真寺門口的圍欄，睇到圍欄頂部非常鋒利。正因相片銳利度明顯地推高，因此雜訊變得比較多，唔放大睇不需要後製，就可以直接分享。
微距鏡像素太低
微距鏡最近對焦距離大約是 4CM，由於相片只有 200 萬像素，張相未放大已經係爛，不過色彩表現都有一定水準。
總結：就算唔用 5G 都唔會伏
小米 10 Lite 5G 最大賣點得一個，就係支援 5G，效能對比同價手機更勝一籌，而且 MIUI 操作系統功能亦十分齊全，就算唔係用 5G 網絡，用 HK$2,499 (6GB+128GB) 或 HK$2,999 (8GB +256GB) 入手都唔會中伏。
始終將價就貨，你付出呢個價買部小米機，相應得到係中階手機質素，只要你保持番呢個合理期望，唔好諗左俾小小錢就有旗艦機效能，咁你唔會覺得伏。不過，你仍幻想俾中階錢得到旗艦機感覺，就只能說你太天真了。
