魅族 STARV Air2 AR 智能眼鏡係一款主打 AI 翻譯、提詞、語音筆記等功能嘅 AR 穿戴設備，售價人民幣 ¥2,799（約 HK$3,000），被定位為日常可穿戴嘅「未來科技眼鏡」。實測到底實唔實用？關箱王為你全面開箱話你知。
產品規格
品牌／型號：魅族 STARV Air2
重量：44g
鏡框：黑色海鷗型設計，鏡腳印有 STARV 標誌
顯示技術：單色綠光光學投影（最大亮度 2000nits）
音訊輸出：非骨傳導式揚聲器，位於鏡腳
操控方式：右側鏡腳滾輪＋按鍵操作，可配合智能戒指
充電接口：USB-C（鏡腳尾部）
支援功能：13 國語言即時翻譯、AR 導航、會議紀錄、語音筆記、提詞器、音樂播放
- 眼鏡外觀與一般的粗框眼鏡無異
- 右柄是全部控制位置，包括滾輪、選擇鍵等
- 適合亞洲人的有托設計
- 部份度可以在外看到鏡片中顯示區域
使用功能
翻譯功能作為主打功能，翻譯表現可以話非常出色。支援 13 種語言即時互譯，字幕反應快、準確度高，對於旅遊、國際會議、外語溝通非常實用。網上唔少開箱都特別提及翻譯功能係最大亮點，實測後都覺得認同。
提詞器可以顯示預設稿件內容，搭配智能戒指操作捲動順暢。不過因為焦距太近，長時間望會攰，而且用喺公開演講時，觀眾容易察覺講者視線飄忽，影響互動與自然度。
AR 導航只建議步行時使用。畫面亮度日頭唔夠、夜晚又太光，焦點距離又近，完全唔適合開車。實測開車使用簡直危險，千祈唔好試，安全最緊要。
語音筆記與會議紀錄聲稱可以轉語音為文字並自動整理筆記，但實測中文辨識準確度未如理想，特別係多人講話時會混亂。對於正式會議仍唔太夠力。音樂播放 支援 QQ 音樂，可播放歌曲與同步歌詞。不過音量偏細，而且容易外洩，私隱性唔高，唔建議喺公共地方使用。想靜靜地聽歌可能要搵個靜位先得。
- 顯示區域很難拍攝，但實際用眼鏡看是清晰的
- 僅綠色的顯示，適合文字
用後感
設計方面，魅族 STARV Air2 外型相當低調，黑色鏡框唔會太浮誇，戴出街唔會令人覺得你係科幻片走出嚟。眼鏡重量只有 44g，屬於超輕量級，長時間配戴都唔會有明顯負擔，對於日常工作或外出使用算係相當友善。操控亦算直覺，右側鏡腳配備滾輪同按鍵，簡單易用，用咗一兩日基本上就熟晒操作邏輯；如果再配埋智能戒指使用提詞器功能，操控體驗會更加流暢。
而顯示方面就比較兩面睇。單色綠光顯示技術雖然有種復古感，但用於顯示文字、指示、簡單圖像其實夠用，亦令畫面資訊唔會過多，減少干擾。而且屏幕亮度足夠，戶外日光下仍然清晰可見，再加上支援自動感光調節，用喺唔同光暗環境都冇大問題。不過，畫面位置設計得比較低，用家要略為低頭先望到內容，起初會唔慣，要花啲時間適應。
鏡片方面係用平面設計，而且無法加裝近視鏡片。對於有度數嘅用家嚟講，長時間使用會出現焦點對唔準、雙眼集中困難、甚至有啲「鬥雞」感，加上顯示距離本身偏近，睇耐會感到眼攰。仲要注意，鏡片左右兩側反光情況幾嚴重，餘光位置有明顯閃光，長時間使用會影響視線集中，呢一點係最大需要改善嘅地方。
功能方面，翻譯功能可以話係整副眼鏡最實用、最成熟、最值得入手嘅重點。即時字幕顯示反應快，支援多達 13 國語言，旅遊、交流、應對外語場景都好有幫助。可惜其餘功能整體表現未達預期。提詞器功能因焦距太近會影響講者與觀眾嘅眼神接觸，令講稿顯得生硬；導航功能日頭太暗、夜晚又太光，加上畫面距離近，開車使用根本唔實際，仲會構成危險；語音筆記、會議紀錄等功能則仍屬試驗階段，辨識準確度不一，實用性一般。
音樂播放功能就比較雞肋，聲音輸出唔算細，但會外洩，唔啱喺公共空間使用，想靜靜地聽歌都要搵靜少少嘅地方先至得。USB-C 充電口位置設喺鏡腳尾部，使用短線或者插行動電源時會卡卡哋，亦唔夠就手，建議未來型號可以調整位置設計。
總結：是未來，但仍然遙遠
魅族 STARV Air2 作為一副試水溫性質嘅 AR 智能眼鏡，的確展示咗未來科技生活嘅可能性，尤其翻譯功能令人驚喜。不過現階段仍然有唔少細節需改進，若你本身係科技愛好者、對 AR 有好奇心，又接受到試用性產品嘅小缺陷，呢副眼鏡就值得一試；但若你期望佢可取代現有裝置，咁就可能要等三代後的進化版本先至啱用。
為什麼是三代？期望是下一代解決鏡頭過於反光與焦距過近問題，二代是獲得用戶反饋後，適當的加入更合適使用的場景，三代是解決加入鏡頭拍攝與續航等底層技術問題。
優點
- 翻譯功能準確、即時、支援多國語言，極具實用性
- 顯示亮度高，即使戶外日光環境亦清晰可見
- 機身輕巧，長時間配戴無明顯負擔
- 操控簡潔，滾輪與點擊設計容易上手
- 顯示自動亮度調節功能，適應唔同環境
- 可配合智能戒指使用，提升提詞器流暢度
缺點
- 僅支援綠色單色顯示，視覺效果普通
- 顯示位置偏低，需低頭查看，使用需適應
- 鏡片為平面無曲度，反光明顯，尤其左右兩側餘光干擾大
- 唔支援近視鏡片安裝，長時間使用眼睛易攰，有鬥雞感覺
- USB-C 充電口位於鏡腳尾端，不便使用行動電源
- 音樂播放音量細兼易洩聲，公共場合使用有私隱問題
- 提詞器因焦距近，演講時易失自然交流
- 其他功能如會議記錄、導航等未達實用程度，仍屬測試階段
