冷氣機嘅種類大致分為4種；窗口式、分體式、窗口分體式及移動式。
窗口式意思即係一部野包含曬”散熱、壓縮機、冷風” ，大部份樓宇建築都會預留窗口式冷氣石屎窗台， 直接安裝係窗口出邊就得。好處是相對於其他冷氣機種類價錢較平，安裝易，需要嘅空間較細，亦唔需要特別裝喉管；壞處因為全部冷氣機組件都係埋一齊，所以壓縮機運作嘅聲音或衍生嘅震動都會直接透過出風口傳出來，即使坊間有唔少聲稱寧靜的窗口機，但只是相對較為安靜， 運作時都有一定嘈音出現。
分體式冷氣將冷氣機一分為二，放係窗口出邊是散熱加壓縮機 ； 出冷風位置就擺係室內。冷氣機用喉管連接兩個部分，一條管負責運送製冷劑，另一條管負責排番D水出室外。
分體嘅好處係壓縮機放左響室外，需知冷氣嘈音的根源就是壓縮機，變相開冷氣時室內就無咁嘈；室內嘅風口位都唔需要就散熱嘅位置，可以裝係屋企咩位都得，有一啲款式個室外機仲可以同屋企幾部室內機連接。
分體式冷氣壞處係價錢比較貴，而且室外嘅散熱加壓縮機如果掛係牆身外，可能需要搭棚去安裝，安裝費用又會再貴啲；而且裝工唔好或者用得耐，可能有機會係室內部機出現滴水問題。
窗口分體式嘅外型同窗口式冷氣機嘅外形十分相似；只需將室外機安裝係窗口位置, 唔需要安裝係牆身外, 可以簡化安裝工序，運作時亦沒有一般窗口機般出現較多嘈音。但售價同埋安裝費用都好似分體式冷氣比窗口機貴。
移動式冷氣機外型就好似一部大型抽濕機，免安裝即買即用。大部分移動式冷氣機底部有滑輪，可以任意移動到不同嘅室內地方。而且移動式冷氣機現在都有除濕、暖氣、送風、空氣潔淨等一機多用，不過就要佔屋企唔少位置，而且嘈音亦相對較大，亦要預留空間散熱同埋排水。
