其實高溫本身對頭髮就一定唔多唔少都會傷頭髮，皮膚掂到高溫都會辣親啦，頭髮都一樣會。再加上夾頭髮有時唔係一下就得，要來回夾幾下，更加容易傷頭髮。雖然發熱板同頭髮產生嘅靜電可以減少毛躁，但都係要注意小心啲。
所以為咗冇咁傷，直髮夾最緊要揀嗰啲溫度有得較嘅，一般都應該keep喺140至220度。不過當然，你啲頭髮厚啲嘅，受熱能力就會高小小，可以用200度倒；如果你啲頭髮好幼，或者已經漂過好多次頭髮，髮質已經好傷嘅，自然受熱能力就一定差好多，就應該用150-180度倒。所以個溫度應該要因應自己髮質而調整，先可以減低傷頭髮嘅機會。順便比個小貼士大家，夾頭髮之前搽啲護髮嘅嘢，例如髮尾油可以幫啲頭髮加一層保護膜，咁就冇咁傷。
咁直髮夾要加熱到調教嘅溫度，自然就要比時間佢預熱。依家大部分出名嘅牌子好似GHD、Amika、Dyson嘅預熱時間多數都只需要十幾秒，算係好快，其他比較普通或者平價嘅牌子就大約30秒至一分鐘內。
