冷氣機嘅種類大致分為4種；窗口式、分體式、窗口分體式及移動式。
窗口式意思即係一部野包含曬”散熱、壓縮機、冷風” ，直接安裝係窗口出邊。通常係舊式屋村、或者一啲較細嘅單位都好容易見到好處係：價錢平，安裝易，需要嘅空間細，亦唔需要特別裝喉管；壞處就係岩先咁講因為全部野係埋一齊，所以當壓縮機轉動時嘅聲音或衍生嘅震動都會直接透過出風口傳出來，用得耐就容易有嘈嘅問題。
分體式意思即係分左兩part，窗口出邊係散熱加壓縮機 ； 出冷風個位就擺係室內。冷氣機用喉管連接兩個部分，一條管負責運送製冷劑，另一條管負責排番D水出室外。
分體嘅好處係室內無左壓縮機，變相無咁嘈；室內嘅風口位都唔需要就散熱嘅位置，可以裝係屋企咩位都得，有一啲款式個室外機仲可以同屋企幾部室內機連接。壞處係價錢貴D而且室外嘅散熱機如果係掛係牆身外，更可能需要搭棚去安裝，又會再貴啲；而且裝工唔好或者用得耐，可能有機會係室內部機出現滴水問題。
窗口分體式嘅外型同窗口式冷氣機嘅外形十分相似；只需將室外機安裝係窗口位置, 唔需要安裝係牆身外, 可以簡化安裝工序。移動式冷氣機外型同抽濕機十分類似，無需安裝於牆身或窗台。大部分移動式冷氣機底部有滑輪，可以任意移動到不同嘅室內地方。
