Nokia 手機母公司 hmd 日前與 Carl Zeiss 蔡司光學簽署獨家合作協議，雙方表明再次合作，並會再次在 Nokia 手機上使用 Carl Zeiss 鏡頭，此舉當然令一眾 Nokia 粉絲大喊興奮。
「識睇一定睇留言」，留言入面唔少都提到 Nokia 可以再做 Lumia 808 PureView，係依家使用 Android 系統嘅基礎上推出高質素鏡頭，而呢個似乎都係今日 Nokia 手機嘅方向，因為今時今日嘅手機賣點之一正正係高質素嘅主鏡頭。
觀乎歷史，其實 Nokia 同 Carl Zeiss 嘅合作其實由石先生仲係學生嘅時代已經開始，當年嘅 Nokia N93 吸引力之高令唔少人甘願用高價購買，確實令人驚喜。
N93 嘅鏡頭以當年來講雖然好大，但佢影出來嘅效果確實比同期嘅好，而且佢獨特嘅 DV 式設計令唔少用家當年都會拿佢來拍片，以當年嘅手機來講好突破。
雖然後來嘅 Nokia Lumia 808 都係用 Carl Zeiss，更加用一個叫 Pure View 嘅名，加埋像素上嘅優勢來吸引大家，但可惜係當年手機嘅系統仲係 Symbian，連 Windows Phone 都唔係，速度慢，用落唔順手等等都係一個死症，所以 Lumia 808 雖然有名，但無實，評測個個話好好，但真正出街用嘅又有幾多個。
今次 Nokia 再次聯合 Carl Zeiss 除左好明顯會延續過去係 PureView 上成功嘅策略外，石先生相信 Nokia 也都吸收左華為夥拍 Leica 提昇品牌嘅優點。
眾所周知，華為品牌以往都被人睇低一線，但自從與 Leica 簽合約後，手機賣得貴左，自家品牌價值及認知度都高左，對華為來講都算係一次極好嘅合作，所以就算華為只係簽左 Leica 個名返來，而唔係真係用 Leica 製作嘅鏡頭都一樣掂。
相類似嘅情況，Nokia 本身呢個品牌係有歷史，但係係過去十年嘅影響力明顯有限，90 後、00 後無 70 後、80 後嘅 Nokia 使用經驗，無情意結，買 Nokia 唔會係買情懷，係買功能，買型唔型。
今次 Nokia 拍住 Carl Zeiss 未必可以係 90 後、00 後眼中加分（因為 Carl Zeiss 呢個品牌都老老地），但作為手機廠肯放錢落去同專業嘅光學廠商合作，呢點總會有加分作用，而且係整個宣傳上都可以增加賣點，令自已嘅 Android 手機更加與別不同。
如果 Nokia 夥拍 Carl Zeiss 後真係用番 Carl Zeiss 嘅光學硬體，再加埋極大像素或變焦能力，咁 Nokia 手機本身就會更有賣點，而唔再係賣情懷咁簡單。
Nokia 與 Carl Zeiss 係呢個時候公佈合作協議絕對唔會係「求其揀個時間」，一定係為左後續要公佈嘅新手機預熱，否則呢類型嘅合作其實唔公佈都一樣無問題。等緊 Nokia X Carl Zeiss 嘅你，係時候留意下傳聞中嘅 Nokia 新手機啦！
